ਚੰਡੀਗੜ੍ਹ-ਪਿਛਲੇ ਸਾਲ ਸੈਕਟਰ-10 ਦੀ ਕੋਠੀ ਨੰਬਰ 575 ’ਚ ਹੋਏ ਗ੍ਰਨੇਡ ਹਮਲੇ ਦੇ ਮਾਮਲੇ ’ਚ ਰਾਸ਼ਟਰੀ ਜਾਂਚ ਏਜੰਸੀ (ਐੱਨਆਈਏ) ਨੂੰ ਬੱਬਰ ਖ਼ਾਲਸਾ ਇੰਟਰਨੈਸ਼ਨਲ ਨਾਲ ਜੁੜੇ ਅੱਤਵਾਦੀ ਸ਼ਮਸ਼ੇਰ ਸਿੰਘ ਉਰਫ਼ ਸ਼ੇਰਾ ਦੀ ਭੂਮਿਕਾ ਦਾ ਪਤਾ ਲੱਗਿਆ ਹੈ। ਐੱਨਆਈਏ ਨੇ ਉਸ ਦੀ ਭਾਲ ਵੀ ਸ਼ੁਰੂ ਕਰ ਦਿੱਤੀ ਹੈ। ਟੀਮ ਉਸ ਦੇ ਘਰ ਵੀ ਪਹੁੰਚੀ ਸੀ ਪਰ ਪਤਾ ਲੱਗਾ ਕਿ ਉਹ ਦੋ-ਤਿੰਨ ਸਾਲ ਪਹਿਲਾਂ ਹੀ ਪਿੰਡ ਛੱਡ ਚੁੱਕਾ ਹੈ। ਇਸ ਕਰ ਕੇ ਏਜੰਸੀ ਦੀ ਮੰਗ ’ਤੇ ਚੰਡੀਗੜ੍ਹ ਸਥਿਤ ਐੱਨਆਈਏ ਦੀ ਵਿਸ਼ੇਸ਼ ਅਦਾਲਤ ਨੇ ਉਸ ਖ਼ਿਲਾਫ਼ ਨਾਨ-ਬੇਲੇਬਲ ਵਾਰੰਟ ਜਾਰੀ ਕਰ ਦਿੱਤੇ ਹਨ।
ਸ਼ਮਸ਼ੇਰ ਦਾ ਨਾਮ ਪਹਿਲਾਂ ਵੀ ਪੰਜਾਬ ਦੇ ਕਈ ਥਾਣਿਆਂ ’ਤੇ ਹੋਏ ਗ੍ਰਨੇਡ ਹਮਲਿਆਂ ’ਚ ਸਾਹਮਣੇ ਆਇਆ ਸੀ। ਇਨ੍ਹਾਂ ਮਾਮਲਿਆਂ ’ਚ ਅਮਰੀਕਾ ’ਚ ਰਹਿੰਦਾ ਹਰਪ੍ਰੀਤ ਸਿੰਘ ਉਰਫ਼ ਹੈਪੀ ਪਾਸੀਆਂ ਤੇ ਪਾਕਿਸਤਾਨ ’ਚ ਬੈਠਾ ਅੱਤਵਾਦੀ ਹਰਵਿੰਦਰ ਸਿੰਘ ਸੰਧੂ ਉਰਫ਼ ਰਿੰਦਾ ਵੀ ਸ਼ਾਮਲ ਹਨ। ਸੈਕਟਰ-10 ਦੇ ਧਮਾਕਿਆਂ ਪਿੱਛੇ ਵੀ ਪਾਸੀਆਂ ਤੇ ਰਿੰਦਾ ਦੇ ਨਾਮ ਸਾਹਮਣੇ ਆਏ ਸਨ। ਸ਼ਮਸ਼ੇਰ ਨੂੰ ਹੈਪੀ ਪਾਸੀਆਂ ਦਾ ਕਰੀਬੀ ਦੱਸਿਆ ਜਾਂਦਾ ਹੈ ਜੋ ਅੱਤਵਾਦੀ ਹਮਲਿਆਂ ਲਈ ਨੌਜਵਾਨਾਂ ਨੂੰ ਭਰਤੀ ਕਰਦਾ ਸੀ, ਹਥਿਆਰਾਂ ਦੀ ਤਸਕਰੀ ਤੇ ਕਰਵਾਉਂਦਾ ਸੀ।
11 ਸਤੰਬਰ 2024 ਨੂੰ ਰੋਹਣ ਤੇ ਵਿਸ਼ਾਲ ਮਸੀਹ ਨਾਮ ਦੇ ਦੋ ਨੌਜਵਾਨਾਂ ਨੇ ਇਸ ਕੋਠੀ ’ਚ ਹੈਂਡ ਗ੍ਰਨੇਡ ਸੁੱਟਿਆ ਸੀ। ਦੋਹਾਂ ਦੇ ਫੜੇ ਜਾਣ ਤੋਂ ਬਾਅਦ ਐੱਨਆਈਏ ਨੇ ਅਭਿਜੋਤ ਨਾਮ ਦੇ ਮੁਲਜ਼ਮ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਸੀ। ਹਾਲ ਹੀ ’ਚ ਪ੍ਰੋਡਕਸ਼ਨ ਵਾਰੰਟ ’ਤੇ ਉਸ ਤੋਂ ਪੁੱਛਗਿੱਛ ਕੀਤੀ ਗਈ, ਜਿਥੋਂ ਪਤਾ ਲੱਗਾ ਕਿ ਅਭਿਜੋਤ ਦੀ ਸ਼ੇਰਾ ਨਾਲ ਫਰਵਰੀ-ਮਾਰਚ 2024 ’ਚ ਅਰਮੀਨੀਆ ’ਚ ਮੁਲਾਕਾਤ ਹੋਈ ਸੀ। ਉਥੇ ਦੋਹਾਂ ਨੇ ਧਮਾਕੇ ਦੀ ਸਾਜ਼ਿਸ਼ ਰਚੀ।
ਜੂਨ ’ਚ ਭਾਰਤ ਵਾਪਸ ਆਉਣ ’ਤੇ ਸ਼ਮਸ਼ੇਰ ਨੇ ਉਸ ਦੀ ਹੈਪੀ ਪਾਸੀਆਂ ਨਾਲ ਮੁਲਾਕਾਤ ਕਰਾਈ। ਇਸ ਤੋਂ ਬਾਅਦ ਅਭਿਜੋਤ ਨੇ ਸੈਕਟਰ-10 ’ਚ ਰਿਟਾਇਰਡ ਪੰਜਾਬ ਪੁਲਿਸ ਅਫ਼ਸਰ ਦੇ ਘਰ ਦੀ ਰੇਕੀ ਕੀਤੀ ਅਤੇ ਪਿਸਤੌਲ ਤੇ ਗੋਲੀਆਂ ਇਕੱਠੀਆਂ ਕੀਤੀਆਂ। ਅਗਸਤ 2024 ’ਚ ਅਭਿਜੋਤ, ਰੋਹਣ ਤੇ ਵਿਸ਼ਾਲ ਨਾਲ ਮਿਲ ਕੇ ਚੰਡੀਗੜ੍ਹ ਆਇਆ ਤੇ ਅਫ਼ਸਰ ਦੀ ਹੱਤਿਆ ਦੇ ਇਰਾਦੇ ਨਾਲ ਕੋਠੀ ’ਚ ਬੰਬ ਸੁੱਟ ਦਿੱਤਾ। ਹਾਲਾਂਕਿ ਉਨ੍ਹਾਂ ਦੀ ਕੋਸ਼ਿਸ਼ ਨਾਕਾਮ ਰਹੀ, ਕਿਉਂਕਿ ਇਸ ਹਮਲੇ ’ਚ ਕਿਸੇ ਦੀ ਜਾਨ ਨਹੀਂ ਗਈ। ਉਕਤ ਅਫ਼ਸਰ ਵੀ ਪਹਿਲਾਂ ਹੀ ਇਸ ਕੋਠੀ ਨੂੰ ਛੱਡ ਚੁੱਕਾ ਸੀ।
ਰੋਹਣ ਤੇ ਵਿਸ਼ਾਲ ਪਿਛਲੇ ਸਾਲ ਇਸ ਵਾਰਦਾਤ ਨੂੰ ਅੰਜਾਮ ਦੇਣ ਲਈ ਸੈਕਟਰ-43 ਤੋਂ ਸੈਕਟਰ-10 ਤੱਕ ਆਟੋ ਰਾਹੀਂ ਪਹੁੰਚੇ ਸਨ ਅਤੇ ਬਾਅਦ ’ਚ ਆਟੋ ਰਾਹੀਂ ਹੀ ਫ਼ਰਾਰ ਹੋ ਗਏ। ਚੰਡੀਗੜ੍ਹ ਪੁਲਿਸ ਨੇ ਕੁਝ ਘੰਟਿਆਂ ਵਿਚ ਹੀ ਆਟੋ ਚਾਲਕ ਨੂੰ ਗ੍ਰਿਫ਼ਤਾਰ ਕਰ ਲਿਆ ਸੀ, ਹਾਲਾਂਕਿ ਉਸ ਦੀ ਹਮਲੇ ’ਚ ਕੋਈ ਭੂਮਿਕਾ ਸਾਹਮਣੇ ਨਹੀਂ ਆਈ ਸੀ। ਸ਼ੁਰੂ ’ਚ ਪੰਜਾਬ ਪੁਲਿਸ ਵੀ ਜਾਂਚ ਕਰ ਰਹੀ ਸੀ ਤੇ ਰੋਹਣ ਅਤੇ ਵਿਸ਼ਾਲ ਨੂੰ ਟ੍ਰੇਸ ਕਰਕੇ ਕਾਬੂ ਕੀਤਾ ਸੀ। ਇਸ ਤੋਂ ਬਾਅਦ ਕੇਸ ਐਨਆਈਏ ਨੂੰ ਸੌਂਪਿਆ ਗਿਆ ਸੀ।
