ਡੇਰਾ ਬਾਬਾ ਨਾਨਕ- ਪਿਛਲੇ ਦਿਨੀਂ ਰਾਵੀ ਦਰਿਆ ਦਾ ਪਾਣੀ ਆਉਣ ਕਾਰਨ ਪੈਸੰਜਰ ਟਰਮੀਨਲ ਵੱਡੇ ਪੱਧਰ ’ਤੇ ਪ੍ਰਭਾਵਿਤ ਹੋਇਆ ਸੀ ਅਤੇ ਲੈਂਡ ਪੋਰਟ ਅਥਾਰਟੀ ਆਫ ਇੰਡੀਆ ਵੱਲੋਂ ਸਖਤ ਮਿਹਨਤ ਕਰਦਿਆਂ ਇਸ ਨੂੰ ਮੁੜ ਚਮਕਾਇਆ ਗਿਆ ਹੈ। ਦੱਸਣਯੋਗ ਹੈ ਕਿ 25 ਤੇ 26 ਅਗਸਤ ਦੀ ਦਰਮਿਆਨੀ ਰਾਤ ਨੂੰ ਰਾਵੀ ਦਰਿਆ ਤੇ ਉੱਜ ਦਰਿਆ ਦੇ ਵਧੇ ਪਾਣੀ ਕਾਰਨ ਡੇਰਾ ਬਾਬਾ ਨਾਨਕ ਦੀ ਕੌਮਾਂਤਰੀ ਸਰਹੱਦ ’ਤੇ ਬਣੇ ਦਰਸ਼ਨ ਸਥਲ ’ਤੇ ਧੁੱਸੀ ਬੰਨ੍ਹ ਟੁੱਟਣ ਕਰ ਕੇ ਜਿੱਥੇ ਭਾਰਤ-ਪਾਕਿ ਜ਼ੀਰੋ ਲਾਈਨ ’ਤੇ ਲੱਗੇ ਗੇਟ ਢਹਿ-ਢੇਰੀ ਹੋ ਗਏ ਸਨ, ਉੱਥੇ ਪਾਣੀ ਪੈਸੰਜਰ ਟਰਮੀਨਲ ਵਿੱਚ ਵੀ ਵੜ ਗਿਆ ਸੀ। ਇਸ ਕਾਰਨ ਇਲੈਕਟ੍ਰੌਨਿਕ ਮਸ਼ੀਨਰੀ, ਕਲਾਕ੍ਰਿਤੀਆਂ ਤੋਂ ਇਲਾਵਾ ਟਰਮੀਨਲ ਦਾ ਅੰਦਰੂਨੀ ਹਿੱਸੇ ਵਿੱਚ ਮਿੱਟੀ, ਰੇਤ ਆਦਿ ਆ ਗਈ ਸੀ। ਪਾਣੀ ਘਟਣ ਤੋਂ ਬਾਅਦ ਐੱਲਪੀਆਈ ਦੇ ਕਰਮਚਾਰੀਆਂ ਦੀਆਂ ਟੀਮਾਂ ਬਣਾ ਕੇ ਟਰਮੀਨਲ ਦੀ ਸਫਾਈ ਸ਼ੁਰੂ ਕੀਤੀ ਗਈ।
ਟਰਮੀਨਲ ਦੇ ਜੀਐੱਮ ਸੰਦੀਪ ਮਹਾਜਨ ਨੇ ਕਿਹਾ ਕਿ ਟਰਮੀਨਲ ਵਿੱਚ ਰਾਵੀ ਦਾ ਪਾਣੀ ਆਉਣ ਤੋਂ ਬਾਅਦ ਐੱਲਪੀਆਈ ਦੇ ਕਰਮਚਾਰੀਆਂ ਨੇ ਇਸ ਸਫਾਈ ਕਰ ਕੇ ਪਹਿਲਾਂ ਵਾਂਗ ਚਮਕਾ ਦਿੱਤਾ ਹੈ। ਉਹਨਾਂ ਕਿਹਾ ਕਿ ਟਰਮੀਨਲ ਦੀਆਂ ਅੰਡਰਗਰਾਊਂਡ ਬਿਜਲੀ ਲਾਈਨਾਂ ਵਿੱਚ ਪਾਣੀ ਹੋਣ ਦਾ ਖਦਸ਼ਾ ਹੈ ਅਤੇ ਬਿਜਲੀ ਕਰਮਚਾਰੀਆਂ ਵੱਲੋਂ ਬਿਜਲੀ ਸਪਲਾਈ ਚਾਲੂ ਹੋਣ ਤੇ ਆਉਂਦੇ ਦਿਨਾਂ ਵਿੱਚ ਮੁੜ ਪੈਸੰਜਰ ਟਰਮੀਨਲ ਨੂੰ ਵੇਖਣ ਲਈ ਸ਼ਰਧਾਲੂਆਂ ਦੇ ਸਪੁਰਦ ਕੀਤਾ ਜਾਵੇਗਾ।
