ਨਵੀਂ ਦਿੱਲੀ – ਕਰਨਾਟਕ ਦੇ ਤੁਮਕੁਰ ‘ਚ ਇਕ ਦਿਲ ਦਹਿਲਾਉਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇਕ ਡਾਕਟਰ ਨੇ ਆਪਣੀ ਸੱਸ ਦੀ ਬੇਰਹਿਮੀ ਨਾਲ ਹੱਤਿਆ ਕਰ ਕੇ ਉਸਦੀ ਲਾਸ਼ ਨੂੰ 19 ਟੁਕੜਿਆਂ ‘ਚ ਕੱਟ ਕੇ ਵੱਖ-ਵੱਖ ਥਾਵਾਂ ‘ਤੇ ਸੁੱਟ ਦਿੱਤਾ।
ਮਾਮਲੇ ਦਾ ਖੁਲਾਸਾ 7 ਅਗਸਤ ਨੂੰ ਹੋਇਆ, ਜਦੋਂ ਪੁਲਿਸ ਨੂੰ ਇਕ ਆਵਾਰਾ ਕੁੱਤੇ ਦੇ ਮੂੰਹ ਵਿਚ ਇਕ ਮਨੁੱਖੀ ਹੱਥ ਲਟਕਦਾ ਹੋਇਆ ਮਿਲਿਆ। ਪੁਲਿਸ ਨੂੰ ਅਹਿਸਾਸ ਹੋਇਆ ਕਿ ਉਨ੍ਹਾਂ ਦੇ ਹੱਥ ਇਕ ਹੱਤਿਆ ਦਾ ਸੁਰਾਗ ਲੱਗ ਗਿਆ ਹੈ।
ਪੁਲਿਸ ਅਧਿਕਾਰੀ ਬੈਂਗਲੁਰੂ ਤੋਂ ਲਗਪਗ 110 ਕਿਲੋਮੀਟਰ ਦੂਰ ਤੁਮਕੁਰ ਜ਼ਿਲ੍ਹੇ ਦੇ ਕੋਰਾਟਾਗੇਰੇ ਸਥਿਤ ਚਿੰਪੁਗਨਹੱਲੀ ਪਹੁੰਚੇ ਅਤੇ ਲਾਸ਼ ਦੇ ਟੁਕੜਿਆਂ ਦੀ ਤਲਾਸ਼ ਸ਼ੁਰੂ ਕੀਤੀ। 5 ਕਿਲੋਮੀਟਰ ਦੇ ਦਾਇਰੇ ‘ਚ ਡੂੰਘਾਈ ਨਾਲ ਖੋਜਬੀਣ ਕਰਨ ਤੋਂ ਬਾਅਦ ਉਨ੍ਹਾਂ ਨੂੰ 19 ਵੱਖ-ਵੱਖ ਥਾਵਾਂ ‘ਤੇ ਸਰੀਰ ਦੇ ਵੱਖ-ਵੱਖ ਅੰਗ ਮਿਲੇ, ਪਰ ਸਿਰ ਫਿਰ ਵੀ ਨਹੀਂ ਮਿਲਿਆ।
ਲਾਸ਼ ਉੱਪਰ ਮਿਲੇ ਗਹਣਿਆਂ ਦੇ ਆਧਾਰ ‘ਤੇ ਪੁਲਿਸ ਨੇ ਅੰਦਾਜ਼ਾ ਲਗਾਇਆ ਕਿ ਇਹ ਹੱਤਿਆ ਲੁੱਟ ਦੇ ਇਰਾਦੇ ਨਾਲ ਨਹੀਂ ਕੀਤੀ ਗਈ। ਇਸ ਦੇ ਪਿੱਛੇ ਕੋਈ ਗਹਿਰੀ ਸਾਜ਼ਿਸ਼ ਜਾਂ ਬਦਲਾ ਹੈ। ਇਸ ਦੇ ਨਾਲ ਹੀ ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਤੇ ਦੋ ਦਿਨ ਬਾਅਦ ਇਕ ਸੁੰਨਸਾਨ ਥਾਂ ‘ਤੇ ਸਿਰ ਵੀ ਮਿਲ ਗਿਆ।
ਲਾਸ਼ ਦੀ ਪਛਾਣ 42 ਸਾਲ ਦੀ ਲਕਸ਼ਮੀ ਦੇਵੀ ਦੇ ਰੂਪ ‘ਚ ਹੋਈ। ਉਨ੍ਹਾਂ ਪਤੀ ਵਸਭਰਾਜ ਨੇ ਉਨ੍ਹਾਂ ਦੀ ਗੁਮਸ਼ੁਦਗੀ ਦੀ ਰਿਪੋਰਟ ਦਰਜ ਕਰਵਾਈ ਸੀ। ਉਨ੍ਹਾਂ ਨੂੰ ਆਖਰੀ ਵਾਰ 3 ਅਗਸਤ ਨੂੰ ਹਨੁਮੰਤਪੁਰਾ ‘ਚ ਆਪਣੀ ਧੀ ਤੇਜਸਵੀ ਦੇ ਘਰ ਤੋਂ ਨਿਕਲਦੇ ਵੇਲੇ ਦੇਖਿਆ ਗਿਆ ਸੀ।
ਐਸਪੀ ਅਸ਼ੋਕ ਕੇਵੀ ਨੇ 48 ਘੰਟਿਆਂ ‘ਚ ਮਾਮਲੇ ਦਾ ਖੁਲਾਸਾ ਕਰਦਿਆਂ ਦੱਸਿਆ ਕਿ ਡਾਕਟਰ ਰਾਮਚੰਦਰਪਾ ਐਸ, ਜੋ ਲਕਸ਼ਮੀ ਦੇਵੀ ਦਾ ਜਵਾਈ ਸੀ, ਨੇ ਆਪਣੇ ਦੋ ਸਾਥੀਆਂ ਨਾਲ ਮਿਲ ਕੇ ਉਨ੍ਹਾਂ ਦੀ ਹੱਤਿਆ ਕੀਤੀ। ਪੁਲਿਸ ਨੇ ਤਿੰਨਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਪੁਲਿਸ ਨੇ ਦੱਸਿਆ ਕਿ ਪੁੱਛਗਿੱਛ ‘ਚ ਮੁਲਜ਼ਮ ਡਾਕਟਰ ਨੇ ਕਬੂਲ ਕੀਤਾ ਹੈ ਕਿ ਉਸਨੇ ਲਕਸ਼ਮੀ ਦੇਵੀ ਦੀ ਹੱਤਿਆ ਕੀਤੀ ਅਤੇ ਸਬੂਤ ਮਿਟਾਉਣ ਲਈ ਲਾਸ਼ ਨੂੰ 19 ਟੁਕੜਿਆਂ ‘ਚ ਕੱਟਿਆ ਅਤੇ ਫਿਰ ਪਲਾਸਟਿਕ ਦੇ ਛੋਟੇ-ਛੋਟੇ ਬੈਗਾਂ ‘ਚ ਪੈਕ ਕਰ ਕੇ ਵੱਖ-ਵੱਖ ਥਾਵਾਂ ‘ਤੇ ਸੁੱਟ ਦਿੱਤਾ।
ਡਾਕਟਰ ਰਾਮਚੰਦਰਪਾ ਐਸ ਨੂੰ ਸ਼ੱਕ ਸੀ ਕਿ ਲਕਸ਼ਮੀ ਦੇਵੀ ਉਨ੍ਹਾਂ ਦੇ ਵਿਆਹ ‘ਚ ਦਖਲ ਦੇ ਰਹੀ ਹੈ, ਇੱਥੇ ਤੱਕ ਕਿ ਉਨ੍ਹਾਂ ਨੇ ਇਹ ਵੀ ਦੋਸ਼ ਲਗਾਇਆ ਕਿ ਉਹ ਉਨ੍ਹਾਂ ਦੀ ਧੀ ‘ਤੇ ਦੇਹ ਵਪਾਰ ਦਾ ਦਬਾਅ ਪਾ ਰਹੀਆਂ ਹਨ। ਉਨ੍ਹਾਂ ਦਾ ਤਿੰਨ ਸਾਲ ਦਾ ਬੱਚਾ ਹੈ, ਅਤੇ ਉਨ੍ਹਾਂ ਨੂੰ ਡਰ ਸੀ ਕਿ ਲਕਸ਼ਮੀ ਦੇਵੀ ਉਨ੍ਹਾਂ ਦੇ ਪਰਿਵਾਰ ਨੂੰ ਬਰਬਾਦ ਕਰ ਦੇਵੇਗੀ। ਇਸ ਲਈ ਉਨ੍ਹਾਂ ਇਸ ਖੌਫਨਾਕ ਵਾਦਾਤ ਨੂੰ ਅੰਜਾਮ ਦਿੱਤਾ।
ਮੁਲਜ਼ਮਾਂ ਦੇ ਕਬੂਲਨਾਮੇ ਤੋਂ ਬਾਅਦ ਪੁਲਿਸ ਨੇ ਘਟਨਾ ਸਥਾਨ ਤੋਂ ਖੂਨ ਨਾਲ ਲਥਪਥ ਕੱਪੜੇ, ਚਾਕੂ ਅਤੇ ਪਲਾਸਟਿਕ ਬੈਗ ਬਰਾਮਦ ਕਰ ਲਏ ਹਨ। ਫੋਰੈਂਸਿਕ ਟੀਮ ਨੇ ਲਾਸ਼ ਦੇ ਟੁਕੜਿਆਂ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
